فالسريع

النهارده الصبح وأنا نازله الشغل اختي طلبت مني أوصلها الكليه في طريقي.. طبعا كانت فكره سيئه جدا لأن أختي في عين شمس.. والعباسيه الصبح كانت عامله زي صينية مقلوبه شامي فيها من كل صنف حته صينيه اورديحي طبعا مكنش في أي لحمه في الموضوع .. الناس كلها مكشره ومكتئبه تقريبا كلهم بيشتغلو غصب عنهم.. فضلنا واقفين كتير في العباسيه ..زوبه مكنتش لسه صحصت أصلي خدتها على مشمها ونزلت بيها.. وهي لما بتنزل بسرعه كدا بتأفش..فقررت تعملها معايا ووقفت زوبه في وسط ميدان العباسيه.. والنبي يا زوبه متعملي في كدا طب وحيات البنزين الي حطيتهولك أول الأسبوع لتقومي..اعدت ابوس فيها وكنت هعيط عالتابلوه بس زوبه منختش أبدا وأول مالزحمه اتحركت شويه الناس الي ورايا طبعا كلهم صوت كلاكستهم علي مره واحده!في اللحظه دي فكرت لو 20 مليون مصري ضربو كلكس في نفس واحد ايه الي ممكن يحصل؟ المهم نزلت عشان ازق زوبه والحمد لله لقيت العشرين مليون مصري نازلين بيزقوا معايا وعدت على خير وديت اختي الكليه.. وانا راجعه بقى من الميدان كنت في الحاره الشمال وفي لفه علي الشمال فضربت اشاره يمين عشان اطلع من الحاره دي والي عايز يلف يلف واز فجأة بعد مالفيت نص العربيه تقريبا وكنت خلاص مبعدل نفسي لقيت واحد تاكسي جاي بأقصى سرعه من آخر حاره في اليمين وبيلف في وشي فضربت فرامل فجأة ودب لقيت الي ورايا لبس فيا! أعصابي تعبت ركنت على جمب ونزلت ابص على زوبه ولقيت العسكري والظابط جايين جري ومعاهم العشرين مليون مصري بيسألوني إزا كنت عايزه اعمل محضر وانا بحارب دموعي وبفكر في الفلوس الي هدفعها عشان اصلح زوبه وهي اصلا مش ناقصه المهم سألتهم على الراجل الي خبطني قالولي دا واحد ياعيني سواق على عربيه نص نقل غلبان قلت خلاص يا بنتي المسامح كريم واهو انتي برضو وقفتي فجأة والعشرين ملون مصري بيقولوي معلش يا مودام سامحيه دا راجل غلبان.. الظاهر انو يقربلهم..المهم قلت للظابط خلاص يا باشا مش هعمل محضر.. وفي اللحظه دي لقيت سواق العربيه النص نقل طالع بيقولي ما هو انتي لو كنتي مفتحه مكنش دا حصل.. الدم غلي في راسي.. دا ابن اللزينه عربيته اكسدامها حديد ومتخربشتش خربوشه..المهم اعد يقول كلام محبش اكرره أنا مهما كان بنت ناس آه! رحت انا رديت عليه اولتله دانتا الي تييت و تييت وانا هطلع ترابانتينك النهارده هات المحضر يا حضرة الظابط الراجل دا لو روح بيتهم النهارده مبقاش أنا بنت أبويا!

لقيت العشرين مليون مصري هيعيطو ويبوسو ايدي وبيتحايلو علي بجد أنا شكيت الراجل دا يالرئيس المنتخب الي هايحرر مصر يا اما يقرب لكل الناس دي.. طب هم ليه بيعملوا كدا.. هما فاكرين انهم كدا بيعملوا خير؟ بيخدوا حق الفقير من الغني؟ لكن دا مش عدل ومش احقاق للحق مش عشان انا عربيتي ملاكي وهو سواق يبقى نسامحه عشان غلبان!! دا مش تحقيق للعدالة الاجتماعية ولا إحقاق للحق.. الحق والعدل ميعرفش غني ولا فقير..العدل هيتحقق لما نبطل نحاول نكيفه على كيفنا.. لما ناخده ونقبله زي ماهو واحد ملوش أشباه

المهم زوبه ماتت المسكينه ومحدش خدلها حقها..انا وديتها للسمكري وهروح اتطمن عليها دلوقتي

اشوفكم على خير

وسلام

جوزيني يا ماما

الإسبوع الي فات جالي عريس.. الي حصل كالتالي.. جارة أختي ومرات صاحب العماره سألتها علي وقالتلها أختك الحلوه دي عندها كام سنه وبتشتغل ايه طبعا أختي انفرجت أساريرها ومسدقتش نفسها وحكتلها تاريخ حياتي بالتفصيل الممل وطبعا أعدت تتفشخر وتتبعجر وعملت البحر طحينه..المهم الست قالتلها ان ابن واحده صاحبتها مهندس وابن حلال وعنده شقه وبيدور على عروسه.. اختي تحمست اكتر وغالبا في اللحظه دي قامت"رقصت" وقالتلها اهلا وسهلا وخليهم يجو ينورونا-نظام تدبيس-المهم الست فعلا رجعت كلمت اختي واتفقت معاها على معاد وقررت مامتي واخواتي الاتنين وبابايا واخواتي واتفقوا كلهم على اليوم والمعاد وكل حاجه.. وجاه الولد وكانت معاه مامته واخته.. وانا كل دا مستسلمه وعماله أفكر يا ترى لو هو دا ايه الي هيحصل؟ ياترى هتجوز وابقى عروسه وسرحت في عالم كله ابيض في أبيض وبيبيهات بتقول ماما وخاتم سوليتير لمعته تعمي الي ميصليش عالنبي ومفوقتش غير وماما جايه جري تقولي جوم جوم لسه مخلصتيش لبس يلا خلصي وكل الكلام دا في نفس واحد مع انها جايه جري كان المفروض تاخد نفسها في النص مرتين تلاته -ملاحظه مامتي من النوع المصري الي هو مش النوع الرشيق يعني تجري وكمان تقول جمل كتير في نفس واحد دا شبه مستحيل-المهم طلعت وأنا مش عارفه اتوقع ايه ولا أحلم بايه؟ ياتري هتجوز؟ اه ماهو كفايه كدا بقى انا اهلي زهقوا مني وبعدين زمان كنت صغيره وبرفض كتير دلوقتي موازيني لازم تتغير.. يعني لازم ابطل الأحلام الي أنا فيها وأعيش في الواقع شوية الحياه صعبه والشباب صيع ومفيش واحد بيدور عالجواز بس كمان كان نفسي أحب واعيش شويه! جواز كدا خبط لزق لأ لأ أنا خايفه بلاش انا مش هطلع.. انت يا بنتي الناس بررره يلاااا

ايوه لأ يا ماما أنا مش هطلع أنا قلت الجمله دي من هنا وفقدت قدرتي على السمع لمدة دقيقه ونص والمده دي هي الي خدتها ماما في الصرخه الي خرمت طبلة وداني أنا والجيران لحد الدور التلتاشر لقيت نفسي قايمه زي الروبوت حاطه الطرحه وطالعه بره زي المزهوله

أهلا أهلا وسهلا إزيك يا قمر بسم الله ماشاء الله بصيت لقيت مدام متشيكة رفيه وبيضه وشكلها يفرح قلت يااه الحمد لله الف بقى ابص الناحيه التانيه.. لقيت شاب شكله قديم.. اه قديم.. يا إما قديم يا إما نموه وقف سنة 85 ماهو الجاكت الجلد الاسود الي فيه فروه في الياقه دا بطلو يعملوه في التسعينات يا نهار اسود دا ماما هي الي بتلبسه دا ولا ايه؟ لا لا بقولك ايه بطلي بقى هتفضلي تعملي كدا لحد امتى؟ الولد مهندس وعنده شقه ازا جات عالبس يعني يا ستي ابقي لبسيه ونضفيه انتي.. أعدت والافكار عماله تيجي وتروح والولد باصص لي ومركز اوي بعدين عدل اعدته ومد رجليه بس ايه يا خواتي عودين مكرونه سباجيتي؟ سيجارتين فرط؟ مش ممكن الولد رفيع اوي اوي يانهار ابيض دانا جمبه فيله وبعدين بقى؟ أنا متعقده خلقه لا لا كدا مش هينفع.. يابنتي كفايه بقى ادي الولد فرصه وبعدين انتي شاطره في الطبيخ ابقي زغطيه لحد ما يملى ويربرب..ومافوقتش غير على صوت فظيع بشع مرعب طالع من المناخير مباشرة مابين صرير الابواب وصرصرة الفيران ببص لقيت بنت زقرده اعده جمبه وبتبصلي جامد وبترد على والدتي بتقولها انا قلت لمامي لازم اجي معاكم.. صوت مصرصر وكمان بتقول مامي؟ معلش معلش يمكن عندها خمس سنين بس معلش متتزرزريش كدا احنا لسه بنشوف ادي نفسك فرصه! ايوه بس صوتها وحش اوي ياترى زي صوت أخوها يانهار اسود صوت اخوها..أنا مسمعتوش ربنا يستر انا هطرطق وداناتي واركز.. سانيه واحده ازاي صوته مطلعش كل دا هو بيتكسف ولا ايه؟ يادي المصيبة!! المهم أنا مش هطول عليكم أنا فضلت طول القعده أدور على صوته وبعد ما روحوا والدتي بتقولي ايه رأيك أنا شايفه انهم مناسبين!! قلتلها مناسبين إزاي بس دا مطلعلوش صوت مفيش غير "مامي"القرشانه والبت امو صوت بيصرصر لقيت البيت كله بيهجم علي وبيقنعوني اني ادي نفسي فرصه وإن يمكن الولد كان "مكسوف"ماهو اكيد مش هيكون مهندس وابن ناس كدا واهبل لا سمح الله! ادي نفسك فرصه

الظريف اني قررت أديهم فرصه عشان يرتاحوا

والأظرف ان العريس ابن الايه فر هارباً ومتصلوش ولا عبرونا

ماما عندها اكتئاب ادعولها ربنا يفك همها

وسلام

تاخد فيزا؟

أنا مزنوقه جداً..ومحدش يقولي خشي الحمام! الحقيقه من كتر ما أنا مزنوقه أنا زهقت واعده بتفرج عالإم بي سي 4 ومش قادره أركز في الي المفروض أعمله ومن كتر السرحان الأفكار أعدت تروح وتيجي في دماغي فقررت ألحق أكتبها قبل ما تطير.. الحقيقه كمان إن أنا مش بس مزنوقه عشان ورايا حاجات أعملها مش عارفه أجيبلها وقت منين لكن أنا كمان مزنوقه ماديا عالآخر ومحدش يقولي أسلفك!!.. ربنا يخلي لي بابا بس أنا تعبت من إني مش عارفه أعيش على قدي مع إن"قدي" مش صغيرأوي! في عائلات في مصر عايشه "على قدي" ..الحقيقه التالته هي إن مش أنا بس الي مزنوقه دا العالم كله مزنوق بيقولو إن السبب هو إن العالم ماكنش عايش على قده وفضلو يصرفو أكتر من الفلوس إلي معاهم لحد مابقت ديونهم وأقساطهم أكبر من دخلهم فبطلو يدفعو الاقساط فالبنوك فلست.. مش عارفه العالم هيفك زنقته إزاي بس الحقيقه أنا عندي فكره هفك زنقتي إزاي.. هزنق نفسي في جمعية! أيوه جمعيه هتزنق آه بس هيبقى معايا مبلغ كويس ادفع بيه الديون الي علي..الحقيقة إن الجمعية دي اختراع مفيد جدا لأمثالي إلي "إيدهم سايبه" .. الحقيقه إني محتاجه الشهرين الجايين أبطل أشتري أي حاجه وأي فلوس هتجيلي هحطها على جمب وادفع بيها جزء من ديوني..بعد مادفع كل إلي علي هقص كل الكريدت كاردز بتاعتي أيوه الفيزا.. أوبرا قالت كدا.. قالت الي معهوش ميلزموش وأنا نويت مزنقش نفسي أبدا بعد كدا..الحقيقه إن "الفيزا" دي مصيبه بتغريك تشتري الحاجات الي مش لازماك ومتقدرش تدفع تمنها.. بحاول أفتكر كنت عايشه ازاي قبل الفيزا. . الحقيقه مكنتش بستلف من حد وأول ما شتغلت قلت لبابا وماما من هنا ورايح أنا مش عايزه مصروف أنا هجيب كل حاجتي لنفسي طبعا دي كانت اكبر غلطه عملتها في حياتي ولحد دلوقتي معرفتش ابطل اخد مصروف بس هيحصل إن شاء الله هيحصل
عشان أوفر شوية فلوس هعمل اكل واجيبه معايا الشغل بدل ماشتري من بره واهو برضو الواحد ينضف معدته الي تعبت من اللغوصه بتاعة الأكل الي في مصر الي مبعرفش ابطله بالرغم من إني متأكده اني لو عملت زياره واحده لأي مطعم في مصر أيا كان مكانه ونضافة قعدته من بره فأنا مش هقدر أحط في بقي صنف أكل تاني ما حييت فعشان كدا افضل اني معملهاش
الحاجه التانيه هي إني هعمل لسته بالحاجات الي نفسي أشتريها وارتب اولوياتي وأوزعها على الفتره الي جايه عشان مشتريش أي حاجه ملهاش لازمه.. بالمناسبه لو حد محتار ومش عارف هيجيبلي ايه في عيد ميلادي فأنا بقوله من دلوقتي التزم باللسته او اديني الفلوس احسن:)
الحقيقه الأخيره هي إني طولت قوي ولازم ارجع أكمل شغل لحسن العلاوه الي عامله حسابي عليها تطير وألبس في الحيط لبسه ما بعدها لبسه
وسلام